Azil në Mbretërinë e Bashkuar - Home Office publikon udhëzimin e ri për “Single Protection Interview”
Home Office ka publikuar një udhëzim të ri që prezanton procesin e “Single Protection Interview” (Intervista e Vetme për Mbrojtje) për disa kërkesa për azil në Mbretërinë e Bashkuar.
Ndryshimi synon të bashkojë në një intervistë të vetme dy faza që zakonisht zhvillohen veçmas: intervistën fillestare të regjistrimit/screening dhe intervistën substantive, ku shqyrtohen në detaje arsyet e kërkesës për mbrojtje.
Çfarë ndryshon?
Më parë, një aplikant për azil zakonisht kalonte në:
Screening interview – intervista fillestare, ku mblidhen informacionet bazë për aplikantin dhe kërkesën.
Substantive asylum interview – intervista më e detajuar, ku shqyrtohen arsyet përse personi kërkon mbrojtje në Mbretërinë e Bashkuar.
Sipas procesit të ri, në disa raste të përzgjedhura, këto faza mund të bashkohen në një Single Protection Interview.
Nëse gjatë kësaj interviste Home Office vlerëson se ka informacion të mjaftueshëm, kërkesa mund të refuzohet dhe të certifikohet si “clearly unfounded” (qartësisht e pabazuar) pa qenë e nevojshme zhvillimi i një interviste të dytë.
Për kë mund të zbatohet?
Procesi mund të përdoret për disa aplikantë nga vende të përcaktuara, përfshirë shtetet anëtare të BE-së, Zvicrën, Islandën, Lihtenshtajnin, Norvegjinë, Australinë, Kanadanë, Zelandën e Re, Japoninë, Korenë e Jugut dhe Shtetet e Bashkuara.
Megjithatë, vetëm shtetësia nuk është e mjaftueshme që një çështje t’i nënshtrohet automatikisht këtij procesi.
Home Office duhet gjithashtu të konsiderojë, ndër të tjera, nëse kërkesa duket qartësisht e pabazuar bazuar në informacionin në dispozicion, nëse nevojitet një shqyrtim më i plotë, nëse aplikanti është në gjendje të intervistohet dhe nëse ekzistojnë çështje cenueshmërie ose safeguarding.
Kush përjashtohet?
Fëmijët e pashoqëruar dhe personat që janë në një proces aktiv për përcaktimin e moshës nuk duhet të përfshihen në këtë procedurë.
Gjithashtu, nëse gjatë intervistës dalin informacione që tregojnë se çështja kërkon një shqyrtim më të thelluar – për shembull, një frikë potencialisht të bazuar nga persekutimi, çështje të të drejtave të njeriut, vulnerabilitet ose nevojë për prova të tjera – rasti duhet të largohet nga procesi i intervistës së vetme.
Shenja të trafikimit të qenieve njerëzore ose skllavërisë moderne nuk e përjashtojnë automatikisht një person nga procedura; një referim në National Referral Mechanism (NRM) mund të zhvillohet paralelisht.
A mbeten në fuqi garancitë procedurale?
Po. Udhëzimi parashikon se garancitë e zakonshme të intervistës së azilit vazhdojnë të zbatohen.
Këto përfshijnë aksesin në përkthyes, mundësinë e pranisë së përfaqësuesit ligjor, përshtatje të arsyeshme kur janë të nevojshme, regjistrimin audio të intervistës, transkriptin dhe një vendim të arsyetuar.
Pas Single Protection Interview, aplikantit duhet t’i jepen të paktën 5 ditë pune për të paraqitur informacione ose argumente shtesë. Mund të kërkohet gjithashtu më shumë kohë përpara se Home Office të marrë vendimin.
Çfarë do të thotë kjo në praktikë?
Ndryshimi mund të bëjë që disa kërkesa për mbrojtje të trajtohen më shpejt dhe me vetëm një intervistë. Për këtë arsye, për personat që përfshihen në këtë procedurë, përgatitja për intervistën dhe paraqitja e informacionit dhe provave relevante mund të kenë rëndësi të veçantë që në fazën e parë.
Çdo kërkesë për azil duhet të shqyrtohet sipas rrethanave individuale dhe aplikantët që kanë paqartësi mbi mënyrën se si procesi i ri mund të ndikojë çështjen e tyre mund të kërkojnë këshillim ligjor.
Burimi: Home Office / UK Visas and Immigration, Single Protection Interview: Caseworker Guidance, published 28 September 2026.
Need advice about your asylum or immigration case?
Av. Saimir Kumrija
SRA Regulated Lawyer
Immigration Department – Bowden Jones Solicitors
London, United Kingdom
Book a FREE 20-minute consultation:
Comments